गोविन्द गोविन्द नाम उचारो.....

                                                                                 ....कर्म की बाती,ज्ञान का घृत हो,प्रीति के दीप जलाओ...
                     ( सवैया छंद में ....)

शीश  वही जो झुके चरनन नित राधा-गोविन्द स्वरुप सदा जो |

 नैन वही जो लखें नित श्याम ,वही शुचि सांवरो रूप लला को |

कान  वही जो सुनें धुनी मुरली बजावै धरे सिर मोर पखा जो |

तन तौ वही जो निछावर होय धरे हिय रूप वा ऊधो सखा को |

हाथ वही जो जुड़ें हर्षित मन देखि के लीला जो गौ  दोहन की |

पैर वही, जो कोसचौरासी चले परिकम्मा में  गिरि गोधन की |

ध्यान वही जो रमे नितप्रति मनमोहिनी वा छबि में सोहन की |

श्याम है मन तो वही,मन ही मन मुग्ध मुरलिया पे मनमोहन की |

गलियां वही वृज की गलियाँ जहां धूलि में लोटें कृष्ण मुरारी |

वन तौ वही वृन्दावन श्याम' बसें जहां राधिका, रास-बिहारी |

ताल वही जहां चीर हरे दई गोपिन  को शुचि सीख सुखारी  |

चीर वही जो बढाये सखा ,सखि द्रुपदि -सुता हो आर्त पुकारी |

बैन वही जो उचारे सदा वही गोविन्द नाम भजे जग सारो |

रसना वही रसधार बहाय , भजे जेहि गोविंद नाम पियारो |

भक्ति वही गजराज करी परे दुःख में गोबिंद काज संवारो |

श्याम,वही नर गोविन्द गोविन्द,गोविन्द गोविन्द नाम उचारो ||